Дар ҳамкориҳои Бонки давлатии амонатгузории Тоҷикистон “Амонатбонк” ва “Сбербанк” –и Федератсияи Россия саҳифаи нав боз гардид.

Тибқи дартуру супоришҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, ва даъватномаи роҳбарияти Ҷамъияти саҳомии оммавии «Сбербанк Россия», гурўҳи кории БДА ҶТ «Амонатбонк» таҳти роҳбарии Раиси Раёсати Бонк - Икромӣ Сироҷиддин Салом аз санаи 27 ноябр то 01 декабри соли 2021, ба шаҳри Москваи Федератсияи Россия сафари корӣ доир намуданд.

Санаи 29 ноябри соли ҷорӣ гуруҳи кории БДА ҶТ «Амонатбонк» ба бинои марказии ҶСО «Сбербанк России» ташриф оварда, бо муовини Раиси Раёсати ҶСО «Сбербанк России» муҳтарам Попов Анатолий Леонидович «Созишнома оид ба ҳамкорӣ»-ро ба имзо расониданд. Пас аз маросими баимзорасонии Созишнома, мулоқоти дуҷониба байни роҳбарон ва сохторҳои мухталифи бонкҳо мулоқот оид ба густариш додани муносибатҳо дар самтҳои мухталифи афзалиятноки молияву ҳисоббаробаркунӣ, баргузор гардид.

Дар рафти мулоқот роҳбарияти БДА ҶТ «Амонатбонк» ва ҶСО «Сбербанк Россия» масъалаҳои ба роҳ мондани ҳамкориҳо дар самти табодули таҷриба, татбиқи технологияҳои муосири рақамӣ дар фаъолияти ҳарруза, тарҳрезӣ ва амалисозии маҳсулотҳои бонкӣ барои муҳоҷирони меҳнатӣ, ҳамоҳангсозии мавқеҳо дар доираи лоиҳаи «Миллион муҳоҷир» бо иштироки Ҷамъияти саҳомии оммавии «Сбербанк Россия» ва баҳрагирӣ аз хизматрасониҳои экосистемаи Сбербанкро мавриди баррасӣ қарор доданд.

Ҳамчунин, дар рафти мулоқот гурўҳи кории БДА ҶТ «Амонатбонк» пешниҳод намуд, ки омодааст бо ҶСО «Сбербанк Россия» дар самти ҷудо намудани қарз ба муҳоҷирони меҳнатӣ муштарак ҳамкорӣ намояд. Пешниҳоди мазкур аз ҷониби ҶСО «Сбербанк Россия» ба хушнуди пазируфта шуд ва ваъда доданд, ки пас омўхтани он дар ин самт корбарӣ хоҳанд кард.

Қайд кардан ба маврид аст, ки тибқи «Созишнома оид ба ҳамкорӣ», миёни БДА ҶТ «Амонатбонк» ва ҶСО «Сбербанк Россия» масъалаҳои зерини муштарак дар ояндаи наздик амалӣ хоҳанд шуд:

а) табодули иттилооти дахлдор оид ба лоиҳаҳои афзалиятноке, ки метавонанд дар доираи қонунҳои амаликунандаи Ҷумҳурии Тоҷикистон ва Федератсияи Россия фаъолияти тиҷоративу иқтисодиро васеъ намояд;

б) табодули иттилоот оид ба шароити иқтисодӣ, молиявӣ ва сиёсӣ, ҳамчунин тағйироти шартҳои мазкур дар кишварҳои бақайдгирии ҳарду Тараф;

в) муҳокимаи масъалаҳои вусъат додани ҳамкорӣ дар соҳаи муносибатҳои муросилотӣ, яъне кушодани суратҳисобҳо;

(г) баррасии густариш додани ҳамкориҳо дар самтҳои тиҷорат ва маблаѓгузории лоиҳаҳои афзалиятноки иқтисодӣ;

д) густариш додани ҳамкориҳо оид ба гузаронидани амалиёт дар бозорҳои ҷаҳонӣ (амалиётҳои банкнотӣ, муомилоти дуҷониба дар бозорҳо байнибонкӣ, истифодаи низоми тиҷорати электронии SberCIB Terminal ва ғайра);

е) муҳокимаи ҳамкориҳо оид ба маҳсулоти милиявии чакана, аз ҷумла оид ба хизматрасонии интиқоли фаромарзии P2P «Интиқоли зуди маблаѓҳо аз Тоҷикистон ба Федератсияи Россия ва баръакс»;

ж) табодули иттилоот ва ҳамкориҳо оид ба рақамикунонӣ;

з) ҳамкориҳо дар самти хизматрасониҳои киберамниятӣ;

и) ҳамкориҳо тавассути Донишгоҳи корпоративии Сбербонк дар самти такмили ихтисоси кормандони Амонатбонк;

к) ташкили мизҳои мудаввар, семинарҳо ва табодули таҷриба байни Тарафҳо бо мақсади беҳтар аз худ намудани шароити соҳибкорӣ ва фаъолияти онҳо;

Боиси қайд аст, ки чунин мулоқот ва вохўрии дуҷонибаи сатҳи баланд дар таърихи Амонатбонк бори нахуст буда, саҳифаи наверо барои дар сатҳи нав ба роҳ мондани ҳамкориҳо замина хоҳад гузошт.

Пас аз анҷоми мулоқот роҳбарони Бонкҳо ба мувофиқа расиданд, ки аз ҳисоби роҳбарони воҳидҳои сохторҳои дахлдори БДА ҶТ «Амонатбонк» ва ҶСО «Сбербанк Россия» гурўҳи кории доимоамалкунанда таъсис дода, бевосита дар самти амалӣ намудани ҳадафҳое, ки дар Созишнома дарҷ гардидаанд, корбарӣ намоянд.